انصار: ( د چنګاښ۳۰مه)، په کابل کې د طالبانو د واکمن رژیم ویاند ذبیح الله مجاهد د امریکا د مخکیني ولسمشر ډونالډ ټرمپ هغو څرګندونو ته غبرګون ښودلی، چې د افغانستان په تړاو یې کړي.
ټرمپ په تازه څرګندونو کې ویلي ، چې د ده د واکمنۍ پر مهال طالبانو په افغانستان کې یو امریکایي سرتېری هم نه دی وژلی او د دې کار جرئت یې نه درلود.
د ده په وینا، د ده پر ځای د اوسني ولسمشر جوبایډن له واکمنیدو سره هغه له افغانستان څخه ځواکونه په نامسوولانه او داسې ډول وویستل، چې د وتو پر مهال یې هم امریکایي سرتېري ووژل شول او طالبانو ته د څه باندې ۸۰ میلیارده ډالره پوځي تجهیزات پاتې شول.
مخکیني امریکايي ولسمشر، چې بیا ځلي ټاکنو ته هم نوماند دی او په نظر پوښتنو کې مخکښ ښکاري؛ طالبان د امریکایي وسلو او تجهیزاتو په پلورلو او چین ته د بګرام هوایي اډې د سپارلو ادعاوې هم کړې دي.
د طالبانو د رژیم ویاند ذبیح الله مجاهد بیا ویلي، چې دوی امریکایي وسلې او تجهیزات نه دي پلورلي.
طالب ویاند د ټرمپ نورو څرګندونو ته غبرګون نه دی ښودلی، خو دومره یې ویلي چې د دوحې تړون دوی له افغانستانه د امریکایي سرتېرو د وتو لپاره کړی و.
د امریکا د ولسمشریزو ټاکنو له را نږدې کېدو سره د افغانستان قضیه بیا د امریکایي سیاستوالو تر منځ په لویې ناندرۍ بدله شوې ده.
URL تعقيب: https://www.ansarpress.com/pashto/32582
امرالله صالح: د طالب جګړه د دین لپاره نه د قدرت لپاره ده، د نورو د ګټو لپاره خپل خلک وژني